مقالات
فوق التلاتين :
بقلمي /حنان سليمان
محرره صحفية بجريدة الاخبار نيوز
بعد ما حبيت و صاحبت وكرهت .. بعد ما حزنت بحرقه و ضحكت بهستيريا
بعد ما اتزنقت في الفلوس .. و بعزقتها
بعد ما اتنصفت .. و اتظلمت و لبست فى الحيط
فوق التلاتين :
اكتشفت ان السعاده موجوده في الحاجات العاديه
الابتسامه .. و الهدوء .. النوم بدري .. و نسيم الفجر .. و صوت الراديو .. الخروجات العاديه مع الناس العاديين اللي بحس معاهم بأحاسيس عاديه .. و كلامنا مع بعض بيبقى عادي .. لا متزوق ولا فيه وعود ناريه و تصريحات عنتريه
فوق التلاتين :
مابقتش بنبهر بالناس
انا كمان بطلت احاول اكون سوبر WoW
ارتحت جدا لما اتصالحت مع فكرة اني شخص عادي و زميل عادي .. و صاحب عادي
فوق التلاتين :
في حروب كتير بيني وبين نفسي انتهت لما اتفقت معاها اني مش لازم اكون الاول ولا الاشيك ولا الاهم ولا الاظرف
فوق التلاتين :
اقتنعت ان اكبر نعم ربنا على الانسان انه يعيش حياه عاديه هاديه ومستقره
فوق التلاتين
نظرتى لاي مرض و خطورته بقت قدر الله و ما شاء فعل و اللى عاوزه ربنا حيكون
جمال الحياة بجد …….. في بساطتها 
