شعر وادب
دور الاب في حياة أولاده مش فلوس وبس
كتبت غرام خطيطة
عزيزي الاب طبعا كلنا فاهمين ومقدرين انك بترجع من شغلك مرهق ومش شايف قدامك وبتفكر في مليون حاجة بس لازم تفهم انك كأب لك دور أساسي ومهم في تربية أولادك وتكوين شخصيتهم في مراحل نموهم جسديا وعقليا وبكده علاقتهم بيك بتزيد الترابط بينكم يعني دورك مش بس فلوس ومصاريف لأ لازم تشاركهم اوقاتهم وده مهم جدا وضروري وتشاركهم العابهم النبي عليه افضل الصلاة والسلام كان بيعمل ظهره مطية للحسن والحسين تخيل بقي سيد الخلق بيلعب مع الأطفال ليقينه أن ذلك مهم للطفل نفسيا وبيسعده لأن اللعب بيقوي العلاقة بينكم ومن خلال اللعب تقدر ووصل لهم ثقافة أو سلوك وميبقاش العلاقة بينكم مجرد أمر ونهي .
واللعب بينمي ذكاء ومهارات ومشاعر الأطفال وبيساعدهم علي زيادة الثقة بينهم وبيكون فيه ذكريات تربط بينهم وده بيزيد رصيد المحبة لك.
في الزمن الماضي كان دور الأب أساسي للتربية بجانب الأم للأسف الدور ده بدأ يقل بالتدريج وده واقع بنعيشه بالرغم من رتم الحياة السريع بطريقة مذهلة أصبح دور الأب مهمش للغاية عشان هو مشغول في جمع الفلوس ليغطي مصاريف الأسرة وبقي ده دوره الأساسي توفير الفلوس والمصاريف وبس .
عزيزي الأب لازم يكون فيه وقفة مع النفس وترجع ويكون لك دور مهم مع ولادك لاعبهم وانزل لمستواهم مهنا كان سنك أو عملك أو مكانتك ولو نص ساعه في اليوم فأولادك لهم حق عليك
