أخبار
شاب مصري قرر يخصص جزء ثابت مين ايراد مطعمه للتبرع لحساب مستشفى السرطان
جايز تفاصيل الصورة ماتكونش واضحة بنسبة 100% عشان زحمة الشباب اللي واقفين كلهم قدام محل ما.. بس ورغم عدم وضوح الصورة لكنها وراها حكاية مهمة خلينا نقولها.. فيه شاب مصري اسمه “أحمد ماهر” عنده 35 سنة ومن محافظة المنيا.. “أحمد” للأسف بنت أخته اتوفت من 4 سنين بسبب السرطان.. في نفس التوقيت كان هو فتح مطعم وجبات سريعة في المنيا.. وفاة الطفلة بنت أخته سابت أثر سلبي فيه فقرر يعمل حاجة ولو تبان بسيطة بس يساهم بيها في دعم مرضى السرطان..
خصص 1% من مبيعات مطعمه لصالح مستشفى 57357 لعلاج سرطان الأطفال وكتب يافطة بالمضمون ده فوق المحل بتاعه.. بس كده؟.. لأ.. “أحمد” وزى ما بيقول في حواره
لما بيجيله شخص محتاج ويطلب ساندوتش بيسأله عن عدد أفراد أسرته وبيعمل حسابهم كلهم ويديله بعددهم أكل ببلاش لإنه شايف إن الخير لازم يجيب خير..
“أحمد” مافكرش كتير ولا حسبها.. قرر ونفذ فوراً.. بركة الرزق بتيجي لما بتفكر في غيرك، وإحساسك بالمحتاج نعمة تستحق تشكر ربنا عليها.. “أحمد ماهر” شاب مصري جدع وأصيل فيه من جينات الأصل والكرم بتاعت المصريين واللي نادر لما تلاقيها عند غيرنا.
