شعر وادب
زقزقة كلمات الحسيني الطاهر
زقزقة كلمات الحسيني الطاهر
تندَهلي وأنَا أندهلَك
بحنيَّة وعلى مهلك
تزقزقلي أزقزقلك
غناوينا تِدَفي الشمس
أمانينا محَبة وبس
مفيش في قلوبنا ذرة يأس
عصفورين وفرعِة توت
تِدُوب فيَّا وأحبَّك مُوت
وأقول للدُنيا هُس سكُوت
وأنسَى الحُزن كُله يفُوت
وأمشي وأدوس على الالآم
وريحة الجو كُله عبير
قلوب الأرض منَّا تغير
وأطير حواليك وأنْتَ تطير
تِغِير منا قلوب الطير
يا قلب كبير
أنا وأنْتَ تعبنا كتير
تعالى حُضنِي كُله بَراح
دنا مخلوق عشان تِرتَاح
شِبعنَا همُوم شبعنَا جرَاح
تعالى لَوِن الأيام تعالى قوام
تعالى نعَلِّى ونتعَالىَ
عن الأوهَام ..تعَالى قَوام
ونبني قشَّة على قشَّة
يومين وتِكمَّل العشَّة
بحبِّة قمح نتعشَّى
نعيش في سَلام ..تعالى قَوام
أحُط دماغِي في جنَاحَك
في عز البرد أدْفَى
وأهدى وأنام.. تعالى قوام
وتتهز الفروع بينا
وتتمايل ونتحايل
ونتمايل على الأغصان ..تعالى قَوَام
دا أنا يا كُل دُنيايا
بعيد عنَّك بكون حيران
أكون تعبان ..تعالى قَوَام
تندهلي وأنا أندهلك
بحنية وعلى مهلك
تزقزقلي أزقزقلك
غناوينا تدفي الشمس
