شعر وادب
انا صياد
مابين الشط والميه..وانا قاعد بمجدافي
ساعة صفا وانا باصطاد في عصرية
ورامي شباكي في الميه
عبر طيفك علي قصادي..لمس قلبي بحنية
سحرني لحظك الدافي..وزاد النبض في عروقي
صبح قلبي ساعتها اسير
ما بين الحب والغية..وبيين الشط والمية
وانا محتار وقلبي ضعيف..لا يتحمل غدر ولا اسية
وانا مسحور بجمالك.. وحسنك الفتان
اكتب لجمالك اغنية.. واغني لحسنك بموالي
سواد الليل علي شعرك..وسحر عيونك الدافي
يانور البدر في سواد ليلي..وضي الشمس في نهاري
وليل العشق في مواويلي..وأريج العطر ف مناديلي
بلاش علي قلبي يوم تقسي..بلاها الغدر والحرمان
رحماك به وبنبضه..يانجمة فجري البدرية
بلاش تزيدي في الاشجان
يامين يصبرني علي قلبي ..وعلي اللي في يوم صابه
من رمش عيونك الجارح..ونار الهجر في بعادك
مين يشفي جراح قلبي..غير سحر عيونك الشافي
انا وقلبي بقينا عبيد..لبحر عيونك الصافي
وانا باصطاد في عصرية..وكان املي اصيد بلطية
لقيت نفسي في بحر الشوق..متصاد في شبكة حورية
انا صياد
